MGNREGA-ah ni 2 inhlawhna siam tawh

Champhai District Level Vigilance & Monitoring Committee chu nimin khan Champhai DC conference hall-ah co-chairman Ronald Sapa Tlau, Rajya Sabha MP hoin thingtlang mite tihhmasawnna tura hna thawh dante an thlirho. Kum kal mekah MGNRE­GA hnuaiah ni hnih chiah inhlawhna la siam a nih thu an tarlang.

Ronald Sapa Tlau chuan, thing­tlanga cheng mipuite hmasawnna tura sorkar laipui sum hman dan­ah a khawihtu department-te’n rinawm tak leh ṭhahnem ngai taka an thawh a ṭul tih a sawi a, “Hmasawnna tura sum dawn tam leh hnathawh tam ai mahin, hmalak china hna thawh ṭhat a pawimawh,” a ti.

Phai lam aṭanga thlai leh sanghate khawi tur leh chîn tura a chi lâk ṭhin chu a tlangpuiin a ṭhat tawk loh thu leh fimkhur a ṭul thu sawiin Rajya Sabha MP chuan, “Sangha chi kan châwk luh ṭhin­ah eng sangha chi nge a nih hriat hleih theih loh chhumchhia leh tê lutuk lak luh ṭhin hi tihtawp a hun tawh,” a ti.

Meeting-ah hian department hrang hrangte’n an hnathawh tarlan dan an sawi hnuah, hna pêng hrang hranga hmasawnna hnathawh thlirletna leh sawihona hun an hmang nghal a ni.

Meeting-a an tarlan danin, Champhai district-ah hian kum kal mek, 2015-16 chhungin MGNREGA hnuaiah ni hnih chiah inhlawhna la siam a ni a; job card nei mi 28,242 an awm a ni.