Hmelhriat neih ṭhat vangin sorkar hnaah a luh theih loh: Home Minister

Tuipuiral Zirlai Pawl (TZP) chuan nimin khan Khawbungah ‘Education Awareness Campaign 2015’ khârna hun an hmang. Khuallian, Home minister R Lalzirliana chuan, hmelhriat neih ṭhat vang ngawtin sorkar hnaah luh theih a nih loh thu a sawi.

R Lalzirliana chuan, Mizoram sorkar chuan zirlaite tan ṭhahnem­ngaiin, zirna tihchangtlun mai bakah hnathawh tur a dapsak zel niin a sawi a, “Sorkar hna dil turin thiamna chhawr tlak a pawimawh ber avangin, duhsakna leh hmelhriat neih ṭhat vang ringawtin luh mai mai theih a ni lo. Tunlaiah mithiam tam tak an awm tawh avangin tling tur chuan theihtawp chhuah a ṭul,” a ti.

Home Minister chuan, zirlaite chu dikna leh rinawmna ngaihlu a, mahni hnam tana rinawm tur leh Zoram tana mi chhenfakawm ni turin thuawihna leh finna nen zir zel turin a chah a ni.

Bialtu MLA T Sangkunga pawhin thu sawiin, “Hlawhtling tur chuan eng zirna in aṭanga zir chhuak nge kan nih tih ai chuan, zirlaia kan tumruhna, teirei peihna leh rinawmna a pawimawh hmasa zawk. Tunlai khawvelah thiamnain hmun pawimawh ber a luah tawh a ni,” a ti.

Education Awareness Campaign hi June 4, 2015 aṭangin TZP chuan a kalpui ṭan a, East Tuipui constituency chhunga khaw 25-ah zirna beihpui an thlak a ni.