ZPM party-in Lalduhoma paih pawi an ti

ZPM party chuan thuchhuah siamin, anti-defection dan tlawhchhana MLA aṭanga ZPM Legislature Party leader Lalduhoma paih a ni chu pawi an ti a, Lalduhoma leh a chhungte an tawrhpui thu an tarlang.

ZPM chuan, MLA aṭanga Lalduhoma bân tura ngentute chu MNF MLA-te an nih thu sawiin, a bàntu Mizoram Legislative Assembly Speaker pawh MNF party aṭanga MLA tho a nih thu an sawi a, "MLA aṭanga Lalduhoma bàntir a nih dan hi dan leh dan inbeihna ni loin, politics-a inbeihnaah kan ngai. Speaker thutlukna hi dan hmanga rorelna ni loin, politics-a rorelnaah kan ngai a ni," an ti.

India ram hmun danga la awm ngai lo Mizoram political history-a chuang reng tawh tur a thleng chu pawi an tih thu sawiin ZPM chuan, "MNF sorkarin mimal inhuatna ni ngeia ngaih theiha Pu Lalduhoma chunga hetiang thil an ti duh mai hi a lungchhiatthlak hle," an ti a; an chet dan chu Mizoram mipui zahlohna leh pawisak lohnaa an ngaih thu an sawi.

ZPM chuan, MNF sorkar chu Assembly House chhung leh páwna thuràwn pek leh sawiselna an ngaitheilo sâwt hle tih sawiin, "An huatthu a chhiain, thuneihna hmanga beih lêt an chíng ta em em mai hi pawi kan ti tak zet. Eng emaw hlekah FIR an ti thuai thuai a, FIR kher loa mimala khap daih tuma ûm zuite pawh an nei ṭhin nia sawi awm leh ṭhinte hi tak tak a nih chuan pawi kan ti hle," an ti a; mipui zalenna rapbet zawnga chêt bànsan turin MNF sorkar an ngen.

Assam sorkar awpna hnuaia khawsa Zo hnahthlak pêng hrang hrangte telna, Thangram Indigenous Peoples Movement (TIPM) hruaitute chuan nimin khan Peoples' Conference (PC) party hruaitute chu an pisaah an kâwm. TIPM hruaitute hi MZP kaihhruaiin an president K Vana Chorei hoin an kal a, PC hruaitute'n an president Lalhmangaiha Sailo hoin an lo dawngsawng.

PC party thuchhuah chuan, Assam sorkarin hun rei tak a awp tawh Zo hnahthlak, 180 square miles chhung, Inner Line Forest Reserved 1875 páwna awmte chu Assam awpna hnuaia awm tawh lo a, Mizoram sorkar enkawlna hnuaia khawsak theihna kawng dapa hma an lâkna chu an thlâwp thu an tarlang a, "An beiseinate tihpuitlin a nih theih nan PC party chuan theihtawp kan chhuah dawn a ni," an ti.