School Education minister Chhandama'n Siaha-a department hmunte a tlawh kual

School Education minister Lalchhandama Ralte chuan December 2, Nilaini khan Siahaa District Institute for Education and Training (DIET), DEO leh Samagra Shiksha DPC office-te a tlawh.

Lalchhandama Ralte hian DIET a tlawhnaah in leh hmunhmáte a fang a, chumi hnuah DIET conference hall-ah DIET-a thawkte nen an inkâwm. Minister chuan, DIET leh School Education office dangte a hmuna tlawh a duh chhan chu, an harsatna leh mamawhte mit ngeia hmuhpui a, sutkian dan a awm leh awm loh hriat chian a duh vang a nih thu a sawi.

Education Minister chuan, DIET-a thawkte chu Siaha district leh Mizorama zirna bulṭhut enkawltu zirtirtute zirtir leh chhâwngtu an nih thu sawiin, "In mawhphurhna a sang em em. Academic excellence lam chauh ni lo, moral reformation lam pawh infah hnem a ngai hle tawh. Zirtirtu chuan an zirlaite chu lehkha thiamna chauh ni lo, khua leh tui ṭha ni tura an chher chhuah a ngai a ni," a ti.

Zirtirtute chu Mizoram khawi hmunah pawh thawk thei tura lâk an nih laiin, khawpuia awm an tum vek chu Mizorama zirna ṭhanmawhbáwk pakhat a nih thu sawiin Minister chuan, "Posting leh transfer khawihin han sîksàwi hlek i la, khawi khawi aṭangin emaw sawipuitu an awm vat zel mai ṭhin," a ti a; Siaha lama an harsatna zinga tam tak chu Siaha a kal hma pawha a hriat sa a nih thu leh a sutkian dan tur a dap kual nasat tawh thu a sawi.

DEO leh Samagra Shiksha DPC office a tlawhnaah Lalchhandama Ralte chuan, MNF sorkarin zirtirtu a la ṭeuh tawh chungin Mizoram pumah zirtirtu indaih lohna a la nasa tih sawiin, "Zirtirtu indaih lohna hi in lo tuarna deuh bik a ni. Tunah hian high school zirtirtu lak tur tihfel vek tawh Covid-19 vanga kalpui hleih theih loh a awm mek a, hengte kan tihfel theih hunah chuan zirtirtu indaih lohna zualpui kan tihfel theih kan beisei," a ti.

School Education Minister hi MLA Prof. F Lalnunmawia, Samagra Shiksha state project director Lalhmachhuana leh department hotu dangte'n an ṭawiawm a ni.