Mipui rawngbawl hi sorkar hnathawkte hna thawh chhan a ni - Chief Secretary

Chief secretary Khilli Ram Meena chuan January 11, Inrinni khan Serchhip DC pisa hall-ah Serchhip district-a sorkar hotute a kâwm a; mipui tana rawngbawl chu sorkar hnathawkte hna thawh chhan a ni tih hre turin a chah.

Khilli Ram Meena chuan, Serchhip district-a sorkar scheme leh programme hrang hrangte ṭangkai taka kalpui a ṭul thu a sawi a, "Hmasawnna atana hmalakna project hrang hrangte dik taka kalpui leh a hun taka zawh a ṭul a, mipui tana rawngbawlna hi sorkar hnathawkte'n hna an thawh chhan a ni tih kan hre tur a ni," a ti a, sorkar hotute chu tualchhung mite harsatna chingfel tura inpeih reng turin a fuih.

Hmasawnna hna thawh a hun taka zawh a nih theih nan department-te'n ṭanrualna leh thawhhona ṭha an neih a pawimawh thu sawiin Chief Secretary chuan, "Serchhip district hi ziak leh chhiar thiam tehna (literacy rate)-ah India rama sang ber a ni a, chuvangin, ṭhalai lehkhathiamte'n eizawnna hlâwk leh ṭha zawk an neih theih nan zirtir uar ang che u," a ti.

Chief Secretary chuan, Mizoram sorkar flagship programme - Bána Kaih (Handholding) Policy tihlawhtling bertu district nih tum turin Serchhipa sorkar department hotute a chah a ni.

Ṭhutkhawm hi SDO (Sadar) F Lalnisai'n a kaihruai a; Serchhip bawrhsap Paul L Khuma'n Serchhip district nihphung, dinhmun leh harsatnate a tarlang. SP MS Dawngkima'n Serchhip police bakah police outpost leh checkpost dinhmun leh an inrelbawl dan tlangpui te, dan leh thupek kenkawhnaa hma an lak dante a sawi bawk.