Mizoramah Missionary Day lawm a ni

Mizoram Baptist Kohhrante chuan January 11, Inrinni khan Missionary Day an lawm a, lawmthu sawi inkhawm an neih bakah, tualchhung kohhran eng emaw zatin ruai an ṭheh.

Missonary Day vawi 132-naah hian zing karah Baptist Church of Mizoram hmunpui, Serkawnah lawmthu sawina hun hman a ni a; Lunglei West bialtu MLA T Lalhlimpuia'n Chief Minister thuchah a chhiar a, BCM general secretary Rev. Dr R Lalbiakliana'n thuchah a sawi. Lungleia Synod Administrative Secretary leh Salvation Army aiawh pawhin thu an sawi a; Lungleia Presbyterian Choir-in hla an rem bawk.

Aizawlah chuan zing karah Zarkawt Presbyterian Kohhran huaihawtin missionary hmasa ber pahnih Rev. FW Savidge (Sap Upa) leh Pu Buanga (Rev. JH Lorrain)-te awmna hmun MacDonald Hill-a missionary lungphunah inkhawm buatsaih a ni a, kohhran hrang hrang mite an tel.

Missionary lungphuna inkhawm hi Rev Dr Lalchungnunga'n a kaihruai a, Rev. C Ronghinga'n Pathian thuchah a sawi a, BCM Aizawl East bialtu pastor Rev. Lalhmunsanga'n malsawm ṭawngṭaiin a ṭìn a ni.

Baptist kohhrante chu Mizoram hmun hrang hrangah chawhma leh chawhnuah an inkhawm a; BCM Headquarters-in thupui a thlan chu 'Lalpa'n thil ropui takte min tihsak' tih a ni. Chawhnuah an zaikhawm hlawm a, kohhran eng emaw zatin tlaiah ruai an ṭheh.

Missionary Day - January 11 hi kum 1894-a Mizorama missionary hmasa ber pahnih - Sap Upa leh Pu Buanga ten Sairang bula Changsil kai an thlen ní a ni.

Hetih lai hian, January 11 hi Mizoram Presbyterian Kohhran chuan an kohhran din ni atan an hmang thung a; tualchhung kohhran tinin zan lamah an hman bakah, kohhran ṭhenkhat chuan chhun lamah an hmang tel bawk.