Bairabi-a double-lane kawng siam hna 2025 kum chanve chhungin zawh tum

Mizoram PWD hnuaia Bairabi khaw chhunga National Highway 154 double-lane kawngpui siam mektute chuan kumin 2025 kum chanve chhungin Bairabi khaw chhunga kawng chu siam zawh hman an inbeisei thu an sawi.

Kolasib district bawrhsap Robert C Lalhmangaiha hoin January 10, 2025 khan DC conference hall-ah sorkar hotute leh khawtlang hruaitute'n Bairabi-a NH-154 double-lane kawng siam mek chungchang an sawiho a ni. Bairabi-a NH-154 double-lane chu Mizoram PWD hnuaiah NIDHI Creative Infrastructure Pvt Ltd-in an siam mek.

Bawrhsap hoa ṭhutkhawmah hian kawngpui siam vanga harsatna awm theite sutkian dan tur te, vantlang tui lakna khaihlak lo zawnga kawngpui siam dan tur te, leivûng paihna hmun tur te, mipui nunphung tibuai lo zawng leh mipui hriselna ngaihtuah chunga kawng siam dan tur te, kawng siam chungchanga mimal ram neitute’n harsatna an neihte a rang lama chinfel dan turte sawiho a ni.

Ṭhutkhawmah hian NIDHI hotute chuan, harsatna lian a awm loh chuan kumin 2025 kum chanve chhungin Bairabi khaw chhunga NH double-lane kawng siam hna zawh hman an inbeisei thu an sawi.