Zemabawk Multi Sports Complex hawng

Zemabawk Multi Sports Complex sak thar chu January 11, Inrinni khan Urban Development & Poverty Alleviation Minister K Sapdanga'n a hawng a, sorkar chu eizawnna kawng hrang hrangah mipui tan a din zel dawn thu a sawi.

UDPA Minister chuan, infiamna hmunhma ṭha tak siam a nih chhan chu ṭhalaite leh ṭhangtharte'n infiamna hmun ṭha tak an neih theih nan a nih thu a sawi a, "A lawmawm rualin, chona nasa tak min pe. Infiamna lamah chauh lo eizawnna kawng hrang hrangah sorkar hi mipui tan a ding zel dawn a ni," a ti.

K Sapdanga chuan, ṭhalaite tana hamṭhatna siam chu sorkar hlawhtlinna a nih thu sawiin, "Kan hma hunah pawh sorkar nen ṭangruala theihtawp chhuaha mipui hmasawnna thlentir hi kan zavaia mawhphurhna a ni," a ti bawk.

Bialtu MLA minister Lalthansanga pawhin thu sawiin, a biala Multi Sports Complex chu khawvel ṭhang zelah ṭhalaite khawvel tukverha an dah ve theih nan ṭangkai taka hman thiam a ṭul thu a sawi a; khawtlang leh ram tana mi ṭangkai tak chher chhuahna hmun a nih ngei theih nan hmang ṭangkai turin a chah.

Aizawl Smart City Limited kaltlanga sak Zemabawk Multi Sports Complex hawnna inkhawm hi UDPA secretary Lalmalsawma Pachuau-in a kaihruai a; Aizawl Smart City Limited chief executive officer CC Lalchhuangkima'n Multi Sports Complex sak dan a sawi a ni.