KHAWTHLIR

YMA-in ruihhlo vangin ni 14 chhungin mi 47 man

Central YMA Kumpuan Committee chuan December 28, 2024 aṭanga January 10, 2025 inkar khan ruihhlo chi hrang hrang an man kaihhnawihah mi 47 an man a; an zinga mi pakua chu Excise & Narcotics department hnenah an hlan a, pathum chu home/centre-ah an dah. CYMA Kumpuan Committee-in ni 14 chhunga ruihhlo an mante chu - heroin (no. 4) hawng 7 leh Tictac bûr 65, Chlonozepam mûm 12, Alprazolum mûm 1,216 Nap-10 mûm 10, Trama mûm 530 leh ganja kg. 18.72 a ni.

Pastor & Pro Pastor Induction service

Mizoram Presbyterian Kohhrana pastor leh probationary pastor, kumina awmna sawn turte chu nimin chawhnu khan an awmna tharah lak luh an ni. Pastor leh pro. pastor induction service hi Synod puipate'n pastor bial hrang hrangah an neihpui a, Synod moderator Rev. RC Lalnghakliana chuan Champhai Vengsang Bialah a neihpui a ni.

Khelmual hawng

East Tuipui bialtu MLA Ramthanmawia chuan January 11, Inrinni khan Vanzau khelmual a hawng. Khelmual siamna atan hian SASCI 2022-23 hnuaiah cheng nuai 19.4 ruahman a ni a, khelmual laih zauh hna chu Vanzau VC hnuaiah thawh a ni. Ramthanmawia chuan, "Field puitling ṭha tak Vanzau khuain an neih theihna tura bul lo ṭantu bialtu MLA hmasa Pu T Sangkunga chungah lawmthu ka sawi a ni," a ti.

MIS training khâr

Mizoram Information Service (MIS) officer-te tana chawlhkar khat chhung IIMC, New Delhi-a Media and Communication Training Course buatsaih chu January 10, 2025 khan khar a ni. Training-ah hian MIS officer 12 an tel a; khàrna inkhawmah hian Ministry of Information & Broadcasting hnuaia Directorate of Publication Division additional director general Rajeev Kumar Jain-a'n certificate a sem a ni.