Chief Justice-in Lawngtlai Jail a tlawh

Gauhati High Court chief justice Justice Vijay Bishnoy chuan January 11, Inrinni khan Lawngtlai District Jail a tlawh a, Special Campaign for Old Prisoners & Terminally Ill Prisoners & Skill Development a hmanpui.

Mizoram State Legal Services Authority (MSLSA) patron-in-chief ni bawk Justice Vijay Bishnoy chuan, National Legal Services Authority-in 'Special Campaign for Old Prisoners & Terminally Ill Prisoners' a kalpui chhan ber chu kum 70 leh a chung lam bakah, tihdam theih loh natna neite jail aṭanga a hma lama an chhuah theih dan kawng ngaihtuahpui a nih thu a sawi.

Justice Vijay Bishnoy chuan, "Jail aṭanga chhuah nghal theih an nih loh pawhin an dikna chanvo zahsak leh duat taka enkawl hi a tum ber a ni. Campaign hnuaiah hian state leh district level-ah team din vek a ni a, a ṭul anga hmalak mek a ni," a ti.

Mi tin tana rorelna dik a awm theih nan national, state leh district-a legal services authority-te'n kawng hrang hranga hma an lak ṭhin thu sawiin Vijay Bishnoy chuan, "Legal aid programme hi a laimu leh pawimawh ber zinga mi a ni a, India rama jail zawng zawngah 'Skill Development and Enhancement Programme' kalpui a ni tawh," a ti a, Skill Development and Enhancement Programme tum tum ber chu jail tángte'n eizawnna tlak thiamna an neih leh an chhuah huna nunphung pangngaia an khawsak theihna tur a nih thu a sawi.

Justice Vijay Bishnoy chuan, Mizoramah ṭha taka Skill Development and Enhancement Programme kalpui a nih avangin jail táng mek leh chhuak tawhte'n hlâwkna tam tak an hmuh thu leh MSLSA leh DLSA-te hnathawh fakawm a tih thu a sawi a; Lawngtlai District Jail-ah Old Prisoners & Terminally Ill Prisoners an awm lo chu lawmawm a tih thu a sawi bawk.

Gauhati High Court judge Justice Michael Zothankhuma, MSLSA executive chairman pawhin thu sawiin, Mizorama jail hrang hrangah inenkawlna felfai tak kalpui a nih thu a sawi a, "Jail tángte'n kut themthiamna an neih theihna tur chi hrang hrang kalpui a ni a, Central Jail-ah chuan huan/thlai enkawl, vawk leh ar vulh, lumeh, carpentry, computer zirna leh a dangte kalpui mek a ni," a ti.

Lawngtlai District Jail-a Old Prisoners & Terminally Ill Prisoners & Skill Development Campaign-ah hian district bawrhsap Cheemala Siva Gopal Reddy leh sorkar hotu dangte an tel a; District Jail-ah hi táng mi 98 awm theihna a ni a, mi 36 an tàn mek thu tarlan a ni.