Khawhai PHC-in NQAS certificate nei thar

Khawhai damdawi-in (Primary Health Centre) chuan India rama sorkar damdawi-in ṭha tehna, National Quality Assurance Standards (NQAS)-ah a tling thar a, Mizorama NQAS national certificate nei sorkar damdawi-in 14-na a ni.

Health & Family Welfare department chuan January 11, 2025 khan India rama sorkar damdawi-in ṭha bik tehna (NQAS)-ah Khawhai PHC a tlin thar thu leh tehnaah 90.13% a hmuh thu an tarlang a, "Heti hian Mizorama sorkar damdawi-in 14-te chu NQAS national certificate nei tawh an ni a, tunah hian sorkar damdawi-in 15-in state level paltlang tawhin, national certificate an dil mek bawk," an ti.

HFW minister Lalrinpuii chuan, India rama damdawi-in ṭha thlan chhuah zingah Mizorama damdawi-in an awm belh zel chu Mizoram tan méllung pawimawh a nih thu a sawi a, "Thawktute thawhrimna leh taimaknate a chhuanawm tak zet a ni," a ti a; sorkar damdawi-in pantu damlote chu a chhawr ṭangkai bertu tur an nih thu a tarlang.

Kar kal ta vêk khan Mizoram sorkar hnuaia damdawi-in pali - Siaha District Hospital, Lawngtlai District Hospital, East Lungdar PHC leh Phuaibuang PHC-te chuan NQAS certification an lo hmu thar tawh bawk.

A hmain damdawi-in pakua - Aibawk PHC, Thingsulthliah PHC, Aizawl Civil Hospital, Lunglei Civil Hospital, Champhai District Hospital, ITI Veng Urban PHC, Chawlhhmun Urban PHC, Haulawng PHC leh Sialhawk PHC-te an lo tling tawh a ni.