One Nation One Ration Card sawifiah
Food, Civil Supplies & Consumer Affairs (FCSCA) department chuan nimin khan thuchhuah siamin, One Nation One Ration Card chungchang an sawifiah.
• India ramah One Nation One Ration Card kalpui a ni ta a, hemi hnuaiah hian NFSA (AAY&PHH) card neituten online Fair Price Shop aṭangin khawi hmunah pawh biometric authentication hmangin an ration quota an la thei tawh a ni. FCSCA department Mizoram chuan Mizoram pawn leh chhung a mite he One Nation One Ration Card hmang ṭangkai tur hian a sawm vek a ni.
• National Portability kalpui mek hnuaiah hian Mizoram chhunga NFSA beneficiarie-te - AAY leh PHH-te hi India ram puma portability hmang thei tur an nih avangin ngaihpawimawh hmasak an ni. National Portability hlawhtling taka kalpui anih theih nan hian ration card leh Aadhaar number thlunzawm ngei ngei a ngaih avangin Aadhaar number la nei lo beneficiary-ten Aadhaar number neih vat leh ration card a thlunzawm hi an mawhphurhna a ni.
• Tun dinhmunah hian India ram chhunga state / UT 26 ah he National Portability hi hman a ni tawh a, Mizoram chhunga NFSA hnuaia ration card (AAY & PHH) nei, an ration card leh Aadhaar Card-te thlunzawm fel tawhte chuan he hamṭhatna kaltlang hian state dang he portability hmang vete hnenah, an ration quota an khul thei tawh. Hetiang vek hian NFSA ration card nei state dang a mite pawhin Mizoram chhunga fair price shop internet signal nei ṭha (district tina retailer thlanchhuah bik) te hnen aṭangin ration quota an la thei bawk a ni.
• National Portability 'One Nation One Ration Card' hi Aadhaar leh ration card thlunzawm tawh NFSA hnuaia ration card neiten e-Pos machine online a hmanna fair price shop-ah he hamṭhatna hi an hmang thei a, ration card holder-in a lakna fair price shop leh hmun hran (inter-state) a a quota a lakna turah pawh online shop kalpui ve tho FPS dealer-te anih a ngai.
• Mizoram chhunga Non-NFSA ration card holder-te tan pawh, ram chhung khawi hmunah pawh ration quota an lak theihna tur (intra-state portability), Mizoram chhung atan a inthlunzawma hman tura kalpui anih avangin Aadhaar leh ration card thlunzawm ngei ngei a ngai bawk a ni. Amaherawhchu, tunlai hrileng avangin mipuite himna ngaihtuah chungin ruahmanna fel tak siamin SOP zawmin kalpui tur a ni.
• National Portability hmangtute chuan ṭum khatah an ration quota 50% an la thei. Hei hi thla chanve hma lam chhungin a ni a, hmun dang aṭanga an quota hi lak ṭhen a nih loh chuan thla chanve hnulamah an quota la bang te an la zo thei ang.