MISTIC Governing Body an ṭhukhawm

Mizoram Science, Technology & Innovation Council (MISTIC) Governing Body chu an chairman Lalduhoma, chief minister kaihhruaiin January 10, 2024 khan CMO conference hall-ah an ṭhu a; Mizoram State Intellectual Property Right Policy te, Science, Techno-logy & Innovation Policy leh thil pawimawh dangte an ngaihtuah.

Ṭhutkhawma tarlan danin, MISTIC hian Research & Development hmalakna hnuaiah kum 2024 khan Lungleiah Science Centre leh Planetarium an hawng a, Khawzawla KVK hmunah Solar Cold Storage (ton 10 dah theihna) Aizawl aṭanga thunun (control) theih an bun.

Phunchawngah four colout web offset press hawn mai theihin an peih tawh a, MINECO-ah Mizoram Biotechnology Centre an sa mek a, Selinga Food Testing Lab tihchangtlun hna an thawk bawk.

Innovation Facility Centre hmalaknain innovation (thil thar chìn chhuah) lam hmun eng emaw zatah an kalpui a, workshop, training leh exhibition te, innovator meet-te an buatsaih ṭhin a; innovator-te an ṭanpui a, intihsiakna leh industry tlawhna hunte an buatsaih ṭhin.

Patent Information Centre hnuaia an hmalakna aṭangin intellectual property right - patent panga, trademark 20, geographical indications panga, copyright pakua leh design pakhat pawmsak (grant) an nei tawh.

Climate Change Knowledge Management hmalakna te, technology deployment te, science lam chawi larna te, zirna-in leh mihring tihhmasawnna lam hmalaknate an kalpui bawk.

Chief Minister hoa ṭhut-khawmah hian Planning Board vice chairman Dr Kenneth Chawngliana leh MISTIC Governing Council member dangte an tel a ni.