Bâna Kaih hi party thliar loin rualkhai taka kalpui tum a ni - Muanpuia Punte

Adviser to chief minister Lalmuanpuia Punte, MLA chuan, Mizoram sorkarin kut hnathawktute khaichhuahna tura flagship programme a neih, Bâna Kaih (Handholding) Policy a duan chu party inthliarna awm loin, rualkhai taka kalpui tum a nih thu a sawi.

Lalmuanpuia Punte hian kár kal ta khan ZPM West Tuipui Block I leh II-te'n Kawrpuichhuah leh Lamthaia vantlang inkhawm an buatsaih hmanpuia thu sawiin, mipui khaichhuahna tura ruahmanna an duan ṭhenkhat chu vote zawnna atan chauha hman an duh loh avangin inthlan zawh tawh hnuah an puangzar chauh niin a sawi a, "Party inthliarna awm loin, rualkhai taka kalpui tum a ni," a ti.

Hrangturzo bialtu MLA chuan, dinchhuah tum tak takte chu sorkarin loan pung lo chi hmangin an bánah kaih a tum thu sawiin, "Sorkarin mipui dinhmun chawikanna tura hmalakna a duante hi a thlâwna sem tur ni loin, hma an lâk tawhna senso rulh letna tur zawk a ni," a ti a; lian tham taka hmalakna kalpui ve thei lote tan Chief Minister's Special Package duan a nih thu a sawi.

Lalmuanpuia Punte hian Mizoram sorkar ruahmanna chak zawka kalpui a nih theih nan sorkar thawhpui theih tur rorel lai party candidate-te thlang tling turin kal khawmte a sáwm bawk.