Vawk vulhah lawmman dawng

Entrepreneurship Development Conclave 2025 chu nimin khan GD Madgulkar Auditorium, Pimpri-Chinchwad, Pune, Maharashtra-ah neih a ni a; SR Piggery Farm, Lengte neitu Zorinpuia'n vawk vulh (piggery entrepreneurship)-a ti ṭha lawmman a dawng. National Livestock Mission - Entrepreneuship Programme (NLM-EDP)-ah Mizoram chu hmarchhak state zinga ti ṭha ber a ni bawk.

Sorkar thuchhuah tarlan danin, Zorinpuia hian India rama National Livestock Mission Scheme hnuaia piggery farm dinna tura in sak aṭanga ran vulh thlengin monitoring leh inspection zawng zawngte ṭha taka a paltlang a; chumi hnuah subsidy thlenga dawng tawhte zingah zo hmasa leh tiṭha ber zingah a tel a ni.

Mizoram chu India rama NLM-EDP-a ti ṭha zual 10 zingah a tel a, hmarchhak state-ah ti ṭha ber a ni. National Livestock Mission Scheme hian sa, bawnghnute, artui leh ran chawa intodelhna tura hma latute ṭanpui nan subsidy a pe ṭhin.

Entrepreneurship Development Conclave hi sorkar laipuia Department of Animal Husbandry and Dairying chuan thlengin, Union Fisheries, Animal Husbandry and Dairying minister of state George Kurian-a'n a hmanpui. National Livestock Mission hmalaknate thirho a ni a; Mizoram AH&Vety additional director (VSPH) Dr F Lalramhluna leh assistant director (FFD) Dr Zohlimpuia te pawh an tel a ni.