KHAWTHLIR

MLA-in hawng

East Tuipui bialtu MLA Ramthanmawia chuan nimin khan a bial chhunga Khawbung khuaah Bazar Shed leh VC Hall a hawng. Bazar Shed chu SASCI 2022-23 sum nuai 38.97 hmanga sak niin; VC Hall chu SASCI 2023-24 sum nuai 33.58 hmangin Bazar Shed chungah sak a ni a; Khawbung VC hnuaia Bazar Building Committee-in an sak a ni.

CYMA pisa tlawh

Lok Sabha MP Richard Vanlalhmangaiha chuan nimin khan Central YMA pisa a tlawh a, CYMA president Lalhmachhuana leh hruaitu dangte nen an inkâwm. Richard Vanlalhmangaiha hian CYMA hruaitute hi YMA-in ruihhlo do a kal pui mek chungchang leh thil pawimawh dangte a sawipui a, ruihhlo dona atan CYMA hnenah Rs 10,000 a hlan a ni.

Ramri ven sawiho

Lawngtlai District Committee on Border Protection Grid chu an chairman Cheemala Siva Gopal Reddy, bawrhsap hoin nimin khan a pisaah an ṭhukhawm a; Myanmar leh Bangladesh mi leh sate ramri pêla an chêt vel dan vil leh thlithlai zui chungchangah state sorkar, BSF, Assam Rifles leh ramri hnaih khua VC-te'n thawhhona ṭha zawk neih ni se, an ti. Lawngtlai DC chuan, Myanmar leh Bangladesh aṭanga raltlan lo lut vanga ram chhung himna leh ralmuanna a derthâwn loh nan ramri venhimnaah ṭan lak lehzual a pawimawh thu a sawi.

Zawhna siam dan zirhona buatsaih

Mizoram Board of School Education chuan nimin aṭang khan MBSE office-ah high school zirtirtute tan exam zawhna siam dan zirhona, ‘Capacity Building for Paper Setters in Line with Standardized Assessment Principles and Developing a Competency-Based Question Bank’ an buatsaih. Azim Premji University aṭangin mithiam pariatte'n district hrang hranga zirtirtu 63-te thil pawimawhte an zirtir a, January 17, 2025 thleng neih a ni ang.