Local supplier-in buhfai a leina FCI-in an chhui chiang dawn

State Level Consultative Committe on Food Corporation of India (FCI) chairman Ronald Sapa Tlau, Rajya Sabha MP chuan, Mizoram sorkarin buhfai supplier atana a rawihin buhfai a leina an chhui chian dawn thu a sawi.

Ronald Sapa Tlau hian nimin khan Aijal Club-ah thuthar thehdarhtute a kâwm a; Mizoram sorkarin mimal hnena buhfai an lei ṭhin chu engtia rei rintlak tur nge tih Supply department pawhin an hriat loh thu sawiin, "FCI chuan supplier hian khawi aṭangin nge buhfai a lei kan chhui chiang dawn. A buhfai lei­na a lo rintlak a nih chuan a ṭha a ni mai. FCI aiin a pe tláwm zawk lehnghal a, sorkar tan chuan thil ṭha tak a ni ang," a ti.
Sorkarin FCI aṭanga buhfai a lei tlem phah vanga supplier-in buhfai a leina hi chhui tur an ni lo tih sawiin, Ronald Sapa chuan, "Supplier hnena buhfai lei a nih avang hian FCI lo inthlahdah ringawt ila, tâwp chin nei se buhfaiah Mizoram kan buai ringawt dawn a ni. Engtianga rintlak nge a nih hriat a ngai a, supplier hi tihbuai kan tum lo," a ti a; Mizoramin buhfaiah harsatna a tawh loh chu an duh ber a nih thu a sawi.
Rajya Sabha MP sawi danin, FCI chuan tun dinhmunah Mizorama buhfai a dahkhawl theih aṭanga chhûti,n 70% a chhêk khawl mek. Mizoram sorkarin mimal aṭanga buhfai a lei tâk avang leh buhfai a chhiat an hlauh avangin hei aia tam chu an chhêkkhawl ngam lo a ni.
Ronald Sapa Tlau chuan, Mizoramin buhfaiah harsatna a tawh lohna atan FCI-in theihtawp a chhuah tih sawiin, "Rel kawng siam ṭhat mek a nih avang emaw, fûrpui lo thlen tur avangin buhfaiah Mizoramin harsatna a tâwk lo turah kan ngai. Chumi atan chuan theihtawp kan chhuah a ni," a ti.
Rengtekawna FCI kudam chu sawiseltu an tam avangin sawn tum a nih tih sawiin Ronald Sapa Tlau chuan, "Sorkarin Sai­rangah leh Lengte leh Sihhmui in­karah ram min sihhmuh a, a hmunhma pawh endik a ni tawh. A pahnih hian neih ve ve kan duh a, buhfai mamawhna a san zel dawn avang­in a chhêkkhawlna neih ṭhat a pawimawh," a ti a; zawhna chhangin, Rengtekawn kudam sawn hun tur erawh hriat a nih loh thu a sawi.
Mizorama FCI-ah thawktu an indaih lo hle tih sawiin, Ronald Sapa chuan, "FCI hnathawkte transfer dawnin Mizorama awm chu inhremna tlukah an ngai a, an hreh hle. Chuvangin, transfer ngai lo tur Mizo ṭhalai FCI-a thawk an tam a pawimawh," a ti. FCI-in thawktu a la thar dawn a, dil turin Mizo ṭhalaite a sáwm a ni.