KHAWTHLIR
Thisen pe
Lengpui Bial KṬP chuan an golden jubillee pualin nimin khan an khuaah blood donation camp an huaihawt a, Synod Hospital tan thisen unit 52 an pe a, a petute mipa 50 leh hmeichhia pahnih an ni.
Lai Grammar
Lai International Christian Relief Committee-in 'Lai Grammar' an buatsaih chu nimin khan minister C Ngunlianchunga'n a pisaah a tlangzarh.
Tuiah tla hlum
Rosangzuali (kum 1) d/o Sangmuanthanga, Hnahlan chu June 18, 2015 tlai dar 3:30 vel khan an ṭhenawmte tuizémah a tla a, damdawi-in panpui a nih laiin a thi.
MHIP-in tanpui
MHIP general headquarters chuan June 18, 2015 zinga Muanna Veng thlanmual mina hnatlangte thingpui inna senso atan Rs. 2,000 an hlan.
Têkin déng chhia
Khatlaa BSNL Telephone Exhange chu nimin khan ṭêkin a déng a, he exhange-in a châwm telephone number 233xxxx te chu hun eng emaw chen hman theih a ni dawn lo. BSNL chuan mipuite hrethiam turin an ngen.
Combined exam
MPSC Civil Services Combined Competitive Examination 2015-a preliminary exam chu nimin khan district tina MPSC exam centre-ah neih a ni a; mipa 1,522 leh hmeichhia 736 an inlan. Main exam chu harsatna a awm loh chuan September 2015 velah neih theih beisei a ni.