Property Tax lâk rih loh kan duh: Tawnluia

MNF senior vice president Tawnluia chuan, "Aizawl Municipal Council (AMC)-in June 16, 2015 aṭanga Property Tax a lak dan hi, felfai taka an chhûtchhuah thiam hma chuan pek rih loh hi MNF chuan kan duh a ni," a ti.

Tawnluia chuan nimin khan Mizo Hnam Runa inkhawmah thu sawiin, AMC-in June 16 aṭanga Aizawl khawpuia Property Tax an lak ṭan chu an khawn danah a buarchuar avangin sawiselna a tam niin a sawi a, chuvang chuan ni hnih an khawn hnuah an chawlh lailawk rih thu a sawi.

Tawnluia chuan, Property Tax-ah in hmun neituin a rama in a sakin, a ram pum awh khat tlata a sak aiin, a ram âwlah chhiah a chawi tam zawk niin a sawi a, "Durtlanga mi pakhat chuan a LSC pahnih atan chiah a pe a, in a sakna ram aiin a in sak lohna ram ruakah a chawi tam zawk a, hei hian a felhlelhzia a ngemnghet a ni,” a ti.

MNF senior vice president chuan, Property Tax pek tur zat an chhût dan chu a chiang tawk loa an ngaih thu sawiin, "Congress sorkar hnuaia AMC hi chhiah pekna tlak niin kan hre rih lo. Revenue department-in chhiah an lak tur chin ti chiang lo leh chhiah lak dan tur felfai buatsaih a nih hmaa chhiah tlingkhawm ît vanga AMC-in mipui sum hmanhmawh taka an khawn hi ṭha kan ti thei lo," an ti a; chhiah an lak tawh pawh chhût ṭha leh a, pe let tura an phût thu a sawi.