V/C aiawh tur Advisory Board din

Local Administration Department (LAD) chuan hmun dang ruala village council (V/C) inthlan theih lohna khaw 31-ah V/C aiawh lailâwk turin Advisory Board a din.

LAD secretary C Thatkunga hnen aṭanga Vanglaini thu dawn danin, DLAO-te'n khawtlang ráwn chhungin Advisory Committee member turte an thlang a; Advisory Committee-ah hian khawtual mi vek ruat an ni a, V/C member awm zat zúlzuiin member zat siam a ni. Committee hian DLAO leh field staff-te kaih­hruaina hnuaiah V/C hnathawh ṭhin an thawk ang.

Zawhna chhangin C Thatkunga chuan, Advisory Committee-te chu V/C inthlan neih a nih hma atana ruat lailawk a nih thu sawi.

April 30, 2015-a Mizorama V/C inthlan neih a nih ṭumin Aizawl district-a khaw 25 leh Kolasib district-a khaw parukah inthlan theih a ni lo a ni.