Ṭhalaite tan khawvel thar kan siam: CM

Mizoram Youth Commission (MYC) leh YMA sub-headquarters, Serchhip ten thla khat chhung Mobile Vocational Training an buatsaih chu nimin khan Serchhip DC conference hall-ah khar a ni. Khârna inkhawma khuallian, chief minister Lal Thanhawla chuan, Congress sorkarin an intiam ang ngeiin ṭhalaite tana khawvel thar siam tura hma an lak thu a sawi.

Lal Thanhawla chuan, infiamna leh thil hrang hrangah hmasawnna hmuh tur a awm mek thu sawiin, ṭhalaite hamṭhatna tur kawng dap tur bik Mizoram Youth Commission pawh mumal taka din a nih thu a sawi a, "A bikin skill development lamah ṭan nasa taka lak a ni. Skill development hi mimal tinin kan mamawh rualin, hnam ang pawhin kan mamawh hle," a ti.

Chief Minister chuan, kai­hruaitu leh zirtirtu ṭha an awm phawt chuan Mizo ṭhalaite chu thil thiam chak leh thiam thil ngah tak an nih thu a sawi.

MYC chairman T Sangkunga pawhin thu sawiin, "Mizo ṭha­laite zingah hna thiam bik nei (skilled labour) kan tlem avangin skill development training hi uar lehzuala kalpui a ngai," a ti a; MYC hmalaknain Mizoram páwnah ṭhalai training tur mi 1,280 thawn an nih tawh thu leh an zinga 630 chuan hna an hmuh tawh thu a sawi.

Mobile Vocational Training hi May 19, 2015-ah ṭan a ni a; Serchhip district chhung khaw hrang hrang aṭangin mi 90-in trade paruk - cement mistiri, beauty & hairing, cutting & tailoring, electric wiring, mobile phone repairing leh two-wheeler repairing-te an zir a ni.