Kelkanga chhungkaw tinte tuizem pe dawn

Hetih lai hian, Kel­kang ṭanpui dan tur hi nimin khan Champhaiah Home minister R Lalzir­liana hoin sawiho a ni a, Champhai DC H Lal­engmawia leh Kelkang khawtlang hruaitute an tel. Kelkanga chhungkua 237-te hnenah vawiin aṭangin in tinah tuizem litre 2000 dawng sem ṭan tura ruahman a ni.

Meeting chuan, Kel­kang khaw mite'n ei­zawnna hna an thawh hman loh avangin ei­zawnna atan chhung­kaw 13 hnenah ar 50 ṭheuh, chhungkaw 216 hnenah vawk hnih ṭheuh pek an rel a; tun dinhmunah vawk-in tur 70% vel sak zawh tawh niin, sorkarin a chung tur rangva a pe dawn bawk.

Swacch Bharat hma­lak­na hnuaiah inthiar­na tur 200 siam nan rang­­va pek tum a ni a;

Dil­­kawn leh Kelkang in tui thiang­hlim an tlan theih turin Dilkawn khaw bula tuikhur lian panna kawng metre 1.5-a zaua siam turin ruahman a ni. Kawlphetha ṭha zawk pek tum a ni a, Kelkang khaw hmun laili leh pawi­mawhah electric ban phun belh tum a ni.

Hetih lai hian, Mizo­ram sorkar chuan thu­chhuah siamin, NLUP sum, bank-a dah pung (interest) hmanga Kel­kang chhawmdawl leh mipuite harsatna zualpui sutkian hna thawh tum chungchang a sawifiah a; NLUP sumte chu dan ang thlapin bank-ah an dah niin a tarlang.

Sorkar thuchhuah chuan, "NLUP Imple­menting Board (NIB) hi registered society a ni a, Apex Board thurêl angin sum tihchingpen awm thei laka inven nan leh thianghlim taka sum lut leh chhuak enkawl a nih theih nan Finance department phalna la thlapin NIB bank account hawn a ni. NLUP hnuaia sum sem tur leh hmanraw lei tur angte election chi hrang hrang avangin a hunah tih hman loh cháng a awm ṭhin a, chumi avang chuan bank-a dah a ngai ṭhin," a ti.