Director hoin RMSA officer-te ṭhukhawm

Nimin khan School Education directorate conference hall-ah director leh SSA& RMSA state project director K Lalthawmmawia hoin RMSA hnuaia DPC meeting neih a ni a; state project office-a officer-te leh district project office-a DPC, deputy DPC leh coordinator-te an tel.

K Lalthawmmawia chuan, an sum hmante chu mipui sum a nih thu sawiin, "Kan nawm kan mâka kan hman tur a ni lo a, mipui sum hmanga rawih kan nih avangin min ruaitu sorkar hna, rawih kan nih chhan tak hna pawimawhna kan hre tur a ni a, tihhlawhtlin hi kan bat a ni," a ti.

School Education director chuan, sorkar hnathawkte'n conduct rules te, financial rules leh inenkawlna tur dan hrang hrangte an ngai pawimawh tur a ni tih a sawi a, "Conduct rules-te hi enchian a, bawhchhiat kan neih leh neih loh en ṭhin tur a ni. Dan hriat loh hi chhuanlam a tling lo," tiin, office rules leh procedure-te hriat chian tum turin officer-te a chah.

Meeting-ah hian, MHRD-a Project Approval Board-in RMSA sum hman tura a pawm chu cheng nuai 2664.44 a ni tih tarlan a ni a, kum kal taa pawmsak tawh bawhzui zelna tur sum awmsa (spill over) nen a vaiin cheng nuai 5843.26 a ni.