Champhaiah NERPAP kalpui dan sawiho

National Electoral Roll Purification and Authentication Programme (NERPAP) hnuaia Champhai district tana special observer Zorammuana, UD&PA director hoin nimin khan Champhai DC Conference Hall-ah NERPAP kalpui tawh dan leh kalpui zel dan tur sawiho a ni.

Meeting-ah hian district chhunga AERO te, BLO ṭhenkhat leh political party leh NGO aiawhte leh chanchinbu mite an tel a; Champhai district election officer Benjamin Lalzama'n NERPAP a sawifiah.

Special Observer chuan, Mizoram chu tlawmngai pawlte nena thawhhona leh ṭawiawmna ṭha awmna hmun a ni tih sawiin, "AERO-te thil dik lo ti tura nawr an awm loh nan an venpui ṭhin a ni," a ti a; electoral roll-a hming chuang si, khua leh tui dik tak a ni lo tih fin­fiahna rintlak a awm chuan insawifiahna nghah ngai loin electoral roll aṭanga paih theih a nih thu a sawi.

Electoral Roll 2015-a lan danin, Champhai district-a Assembly constituency pangaah voter 79,550 an awm a, polling station 134 a awm. Khaw 100-ah Aadhar registration tih tawh niin, Aadhar hnuaiah hian mobile number 41,516 leh e-mail ID 293 lak tawh a ni.