Lalsawta'n UBI branch 3-na a hawng

Mizorama United Bank of India (UBI) branch pathumna, Mission Venga mi chu nimin khan Finance minister Lalsawta'n a hawng. Lal­sawta chuan, loan rûl ṭha lote'n mi hlawhtlinna tur an dâl theih thu a sawi.

Finance Minister chuan, bank hawn a nih­in mipui rawngbawlna a keng tel tih sawii, "A dawrtu mipui tan ṭanpuitu leh tiawlsamtu a ni tur a ni a, a dawrtu mipui lam pawh rinawm leh dik a ṭul a ni," a ti a; Mizo ṭhalai ṭhenkhat, ram dang mi ngaihsan vanga an bank account-te hmantir a, buma awm ta tam tak awm chu pawi a tih thu a sawi.

Mizo tam takin bank aṭanga loan lâk an rulh ṭhat loh avangin bank lamin loan pek an hreh phah tih sawiin, Lalsawta chuan, "Chu chuan a hnua mi dang loan la turte tan harsatna a siam a, a pawi hle a ni," a ti. Loan rûl ṭha lote avangin mi dang ding chhuak turte'n an tawrh phah tih sawiin, "Mi dang hlawhtlinna leh chhiatna thlen theitu chu keimahni hi kan ni. Loan la tu zawng zawngte'n ṭha taka an rulh zel a pawimawh," a ti.

UBI branch thar hi Khatla Branch tih a ni a; UNI assistant general manager Janmejay Dikshit chuan, Khatlaah in luah tur an hmuh mai loh vang leh RBI lam aṭangin Khatla Branch tia phalna pek an nih si avangin Khatla Branch tih a ngai ta niin a sawi.

UBI hian ramah branch 2,006 a nei a, Mizoramah branch pathum an nei tawh a, vawiinah Kolasib-ah branch hawn leh an tum a ni.