MZU zirtirtute'n Delhi-a nawrhna an thlawp
Mizoram University teachers' Association (MIZUTA) chuan thuchhuah siamin, All India Federation of University and College Teachers' Organisations (AIFUCTO) leh Federation of Central University Teachers' Associations (FEDCUTA) ten nimina University Grants Commission (UGC) pisa, New Delhi kawta lungawi lohna an lantir chu an thlawp thu an tarlang.
MIZUTA tarlan danin, AIFUCTO leh FEDCUTA-te UGC pisa kawta lungawi lohna an lantir chhan, an thil phûtte chu - India ram puma zirtirtute tana Pay Review Committee a rang thei anga din te, appointment leh promotion atana hman mek Academic Performance Indicator (API) tihbo leh promotion chak zawka kalpui leh, MHRD-in order a chhuah tawh Choice Based Credit System (CBCS) leh Common Central Universities Bill, 2013 hnuhkirte a ni.
MIZUTA chuan, India rama Higher Education Policy thlak a nih dawnah a kaihhnawih - teacher organization leh student council-te ráwn miah loa Ministry of Human Resource Development-in order a siam chu ṭha lo an tih thu an sawi a, "A ṭhatna leh ṭhat lohna sawihona hun siam sak phawt turin MHRD kan phût tlat a ni," an ti. AIFUCTO leh FEDCUTA-te thil ngiat chu ngaihtuahsak ngei tura MHRD an phut thu an sawi bawk.