MLA-te'n sorkar hnathawh an enfiah In pakhat nuai 63-a thiah a to an ti

Mizoram Legislative Assem-bly-a Estimates Committee member-te chuan, nimin khan Tlawng lui chhak Dihmunzawla PHE tui pump-na leh an hnathawhte leh SIPMIU-in Chite kama Sewage Treatment Plant siam mek an enfiah. MLA-te chuan, Dihmunzawla PHE building hlui pakhat cheng nuai 63-a ṭhiah a ni chu to uchuak hlea an hriat thu an sawi.

Assembly Estimates Com-mittee-te hi an chairman Lal-rin-liana Sailo hoin an thawk chhuak a, member dang kal-te chu - Vanlalzawma, T Sang-kunga leh R Vanlalvena te an ni a; Dr Ngurdingliana leh Vanlalawmpuii Chawngthu te an tel thei lo.

PHE leh SIPMIU-in Dihmunzawla hna an thawh mekte endikin, hna thawh dan tur ruahmanna nen a inmil leh inmil lohte an enfiah a ni.

Estimates Committee mem-ber-te chuan, kawlphethaa PHE tui pump-na châwmtu tur, Dihmunzawla 132 KV sub-station siamna hmun tura tiha PHE in hlui, RCC building ṭhiah nan cheng nuai 63 hman a ni chu to uchuak an tih thu an sawi a; SIPMIU officer-te sawifiahnaah an hmin loh thu an sawi.

SIPMIU official-te'n an sawi--fiahnaah, in ṭhianna sensoah chuan lei hnuai lama tanky
ṭhiah-na a tel niin an sawi a; chu-mi chungchangah chuan Committee chairman Lalrinliana Sailo chuan, "Power sub-station dinna hmun tur tihzâwlna (earth work) atan a hranpain cheng nuai 35 hman a ni tho a. Min hmin lo a nia. Fimkhur rawh u," a ti.

Lalrinliana Sailo chuan, sorkar department-in mipui rawngbawla hna an thawhnaah an sum hman mila hna an thawh a pawimawh thu a sawi a; sorkar hmalaknate chu a chhawr tur mipui tan hman ṭangkai theih a ni dawn em tih enfiah chu Committee on Es-timates tum ber a nih thu a sawi.

PHE building ṭhiattu contrac-tor hming an zawhna chu SIPMIU hotute chuan, contractor an awm loh thu leh power sub-station siam hna thawktu contractor-in an khawih nghal thu an sawi.

MLA Vanlalzawma leh R Vanlalvena te chuan, in ṭhiahna atana cheng nuai 63 sen a ni chu tam lutuka a hriat thu an sawi.

T Sangkunga chuan, PHE building aia lian daih leh ṭha zawk Dinthar Presbyterian Kohhran biak-in
ṭhiattuin Rs. 2,00,000-a a ṭhiah ngam thu a sawi bawk.

SIPMIU hotute chuan, tui pump-na atan bika hman tur 132KV power sub-station siamnaah hian hna 35% zawh a ni tawh tih an sawi. Sub-station siam hna hi SIPMIU hnuaia thawh a ni a, zawh a nih hunah PHE hnenah an hlan ang a; Luangmuala sub-station aṭangin kawlphetha lak a ni ang.

MLA-te chuan, PHE depart-ment leh SIPMIU-in Aizawla hna an thawhte an enfiah hmasak
ṭumin, tuizem siam chungchangah inmil lo leh inthuah a awm nual thu an sawi a, "Inthuah a awm a, ziaka in report-ah PHE record leh SIPMIU record a inmil lo a ni," an ti a; report siam uluk tur leh Assembly namnûl lo turin an chah.

PHE leh SIPMIU hotute chuan, Aizawla PHE tanky
ṭhenkhat chu hlui tawh vangin an hmang zui lo a, SIPMIU lamin a thar an siamte hman tâk zawk a awm tih an sawi.

Committee on Estimates member-te hian Bethlehem Veng leh Bethlehem Vengthlanga Sewage Treatment pipe network an enfiah bawk a. Pipe network hmang hian Aizawl khawpui êkthli lak khawm a ni ang a, Chitea 10 MLD dawng Sewage Treatment Plant-ah veng 19-a in tinte thli chu sawngbawl a ni ang. Tunah hian veng parukah pipe phûm hna thawh zawh a ni tawh.

Committee on Estimates member-te hi PHE, UDPA, SIPMIU leh Assembly House hotute'n an ṭawiawm a ni.