Thanmawia thih danah tualthah thubuai ziak lut

Lalthanmawia (48) s/o Thatliana, East Lungdar Venghlun chu Thawhṭanni zan dar 8 vel khan a hliam tuar loin Aizawl Civil Hospital-ah a thi a; a thih chhan hi East Lungdar VDP-te'n thil sual ti nia hriaa mana kut an thlak vang nia sawi a nih vangin tualthah thubuai ziah luh a ni.

Thu dawn danin, Lalthanmawia hian July 25, 2016 zing lama a feh tur chu khawlaia naupang infiam zinga hmeichhe pakhat dulah a khawiha sawi a ni a; July 25 vek zan dar 9 velah East Lungdar VDP-te'n koin, an dâwp a, kut an thlak. Lalthanmawia chu a hliam nat deuh avangin August 1, 2016-ah Aizawl Civil Hospital panpui a ni a; a kal (kidney) a chhia a, a chuapah tui a tling bawk niin an sawi. A hliam tuar loin August 8 zan dar 8 velah a thi a ni.

He thil thleng kal zelah hian Lalthanmawia lakah hian naupang chhungte'n police-ah FIR an thehlut nia thu dawn a ni. Hetih lai hian, Lalthanmawia ruang hi nimin khan postmortem a ni a; doctor-te'n 'Mi kut tuara thi' anga an ziah avangin North Vanlaiphai Police Station-ah tualthah thubuai ziah luh a ni.