KHAWTHLIR

Thisen pe

Chhiahtlang Kawnveng Branch KTP-te chuan, an branch diamond jubilee lawm nan nimin khan an Kohhran hall-ah blood donation camp an huaihawt a; Serchhip District Hospital tan mipa 27 leh hmeichhia 15-te'n thisen unit 42 an pe.

Thupek sût

Traffic SP chuan thu-chhuah siamin, Rangvamuala lei min/tawlh thenfai hna thawh a nih vanga zan dar 10 aṭanga zing dar 5 inkar chhung lei tawlhna hmuna kawngpui khârna thupek chhuah chu, hna thawh a nih hrih loh avangin sût a ni tih a tarlang.

Hnathawh sawiho

State Geological Programming Board (SGPB) chu nimin khan Industries secretary K Zothankhuma hoin Aijal Club-ah an ṭhukhawm a; Geology & Mineral Resources department-in kum kal taa an hnathawh leh kum thara an hma-chhawp hrang hrangte an sawiho.

Teachers' Day

Lawngtlai District Committee for Celebration of Teachers' Day chu nimin khan Lawngtlai additional DC R Lalsangluaia hoin a pisaah an ṭhukhawm a; zirtirtu damlo leh harsatna tâwkte ṭanpuina atan sorkar leh mimal sikula zirtirtute'n Rs. 50 ṭheuh thawh khawm ni se, an ti. Mamitah pawh nimin vek khan DC Lalbiaksangi hoin Teacher Day hman dan tur rel a ni a, day pualin rally buatsaih an rel.

V/C candidate

Kum 2015-a village council inthlanpui neih ruala inthlanna neih ve theih lohna, Electric Veng, Khawzawla V/C inthlan neih tur atan seat panga chuh turin mi 11-in hming an pe lut. General seat pali chuh turin Congress candidate pali, MNF pathum, ZNP pakhat leh independent pakhatin hming an pe lut a; reserve seat chuh turin Congress leh independent chiahin hming an pe lut thung.

Kawng siam

Pangzawl khuaa lirthei neitute chuan, tun hnai khan Pangzawl leh Thiltlang inkara NH-54 kawngpui chhe lai siamin an hnatlang a, kawng khuar zual laite lungin an hnawh. Hnatlangte hi Pangzawl V/C-te'n an ṭawiawm a ni.