MLA-te'n P&E hnuaia hnathawhte an enfiah

Mizoram Legislative Assembly-a Public Accounts Committee member-te chuan, nimin khan Power & Electricity department project kal lai pahnih, Luangmuala mi leh Melriata mite tlawhin an enfiah.

Assembly Public Accounts Committee hian Comptroller & Auditor General of India Audit report 2011-12 a lang, Tripura leh Manipur aṭanga kawlphetha lak luh khaihlak chánga Bairabi Thermal Power Plant emaw, Assam aṭanga direct-a kawlphetha châwk luhna tura cheng vbc. 28.66 sênga Luangmuala 132 KV double line siamna tur DoNER hnuaia December 2005-a sum hmuh tawh, thla 36 chhunga thawh zawh tura tih, tun thlenga la thawh zawh loh an enfiah a; hna thawh muan chhante endikin, a
ṭul anga hmalak zel dan turte an thlir a ni.

Melriatah chuan CAG Audit report 2011-12 a lang tho, NEC hnuaia P&E department project, cheng vbc. 15.54 senga power sub-station March 2012-a siam zawh tawh tun thlenga la hawn (commission) loh leh hman a la nih loh chhante an enfiah bawk.

Assembly PAC member-te
aṭanga thu dawn danin, Melriata power sub-station hi Mizoram chhim lam hmun hrang hrang kawlphetha pekna ruahman tharin a paltlang tur a ni a, siam zawh a nihna rei tawh viau mah se, tun thlengin hman ṭangkai a la ni lo.MLA-te hian sum hman dan a dik leh dik loh enfiah lam an buaipui lo a, hna thawh zawh tawh, tun thlenga la hawn loh chhan an enfiah a ni.

Hawna hman a la nih loh chhan MLA-te'n an zawhna P&E hotute'n an chhanna chu a holam viaua an hriat thu an sawi a; P&E hnuaia hnathawh a nih avangin P&E-in an buaipui zui mai thei tura an ngaih thu an sawi bawk.

Assembly PAC member-te hi an chairman K Sangṭhuama hoin an kal a, member kal dangte chu RL Pianmawia, Lalrobiaka, Lalthanliana leh Lalruatkima te an ni a; S Laldingliana leh Chalrosanga Ralte te kal thei lo thung.