ASHA-te VHSNC chungchang zirtir

Nimin khan Chanmari YMA Hall-ah Aizawl West Chief Medical Officer hnuaia ASHA, Village Health, Sanitation & Nutrition Committee member-te pualin National Health Mission (NHM) hnuaia Village Health Sanitation & Nutrition Committee (VHSNC)chungchang zirna an buatsaih.

Training hmanpuitu, NHM mission director Dr K Lalbiak-zuala, Hospital & Medical Education director ni bawk chuan, ASHA-te chu nasa taka hriselna lama hmasawnna tura thawktu an nih thu sawiin, an hriatna leh thiamnate mipuiin an chhawr
ṭangkai leh zual theih nana nasa zawka thawk zel turin a chah.

Dr K Lalbiakzuala chuan, nu-in damdawi-ina nau a neih dawnin, awmpui tura a duh ber thlan theihna dan kalpui tum mek a nih thu a sawi a, "Hei hian nu, nau neite tan awlsam zawkna a thlen dawn a. Nau an neih hma aṭanga nu leh pa nih zirtirna leh naute an neih hnu thleng pawha zirtirna
ṭha an dawn theihna tur program kalpui ṭan mek a ni," a ti.

Dr R Lalchhuanawma chuan, VHSNC chu village council hnuaia committee pêng pakhat, khawtlang huapa din a nih thu leh khawtlang a hrisel zawk nan sorkar hriatpui khua zawng zawngah din tur a nih thu a sawi a, "Mizoramah sorkar hriatpui khua 830 a awm a, chungahte chuan VHSNC din vek tawh a ni," a ti. VHSNC-ah hian member-secretary chu ASHA a ni ngei tur a ni.

Dr R Lalchhuanawma sawi danin, Mizoramah ASHA 1,091 an awm mek a; nu leh nausen thihna tihtlem kawnga hma la ber tur pakhat niin, in tin an tlawh chhuak ṭhin. Kum 2014-15a Mizoram infant mortality rate (IMR) chu 32 (Nau piang 1,000 zelah 32 an thi tihna) a ni a; kum 2015-16 chhunga IMR chu 22-ah a tlahniam a ni.

Training-ah hian ASHA-te chu mithiamte'n thil pawimawh hrang hrang an zirtir a, vawiinah chhunzawm a ni ang.