BJP-in hnam hnufual kutthlak an dem

BJP, Mizoram Pradesh chuan thuchhuah siamin, tun hnaia Hindu pawl ṭhenkhat, bawng humhalhtu intite'n India ram state ṭhenkhata bawng humhalh chang-chawia hnam hnufual (dalit)-te kut an thlak chu pawi an tih thu an tarlang a; chutih rualin, prime ninister Na-rendra Modi-a'n dalit-te thlavâng a hauh chu lawmawm an tih thu an sawi.

Mizoram BJP chuan, bawng humhalhtu intite chêt dan chu PM Narendra Modi-a'n demin, "Dalit-te in kah ai keimah min kap zawk rawh u," tiin a sawi niin an tarlang a, "PM-in na taka bawng humhalhtu intite chêt dan a sawisel hian BJP hi Hindu sakhaw bik pawl leh Hindu sakhaw la vungtu party a nih lohzia a tarlang chiang hle," an ti.

Tunah chuan Congress nihphung leh zia tak tak India mipuite'n hriain an hnâwl ta zel nia sawiin, Mizoram BJP chuan, "Mizoramah pawh Congress zia leh nihphung mipuite'n kan hre chiang ve zel a, kum 2018-a Assembly inthlan awm turah pawh Zoram mipuite'n Congress party hi kan hnâwl ngei dawn a ni," an ti a; Congress mi tam takin BJP an zawm tawh niin an sawi.

Mizoram BJP-te chuan, CAG-in Mizorama lottery kalpui danah PIL a luh vanga chhuichianna neih a ngai ta chu pawi an tih thu leh hnam anga mualphona a nih thu leh zahthlak an tih thu an tarlang bawk a; "Lottery chungchanga an thil tih dan dik tak mipui hnena puangzar turin Mizoram sorkar kan phût," an ti.