Computer-a ram chhinchhiah dan sawiho

Project Management Unit (PMU) Governing Body chu nimin khan chief secretary Lalmalsawma hoin CS confe-rence hall-ah an ṭhukhawm a; computer-a ram chhinchhiah dan tur an sawiho.

Kum 2008 aṭang khan India ram pumpuia computer-a ram zawng zawng chhinchhiahna tur National Land Records Modernisation Program (NLRMP) kalpui a ni a, Mizoramah pawh Land Revenue & Settlement department-in NLRMP hi an kalpui mek.

Ram chhinchhiah rûnpui hi kum 2011-12 aṭang khan district paruk tuam tura hna ṭan a ni a, Lunglei leh Serchhip district-ah zawh a ni tawh a; Aizawl leh Champhai district-ah hmalak mek niin, Kolasib leh Mamit district-ah erawh hmalak a la ni lo.

Mizorama mite ram neih dan, Land Record leh Property Registration-te chu digitise vek tura ruahman a ni a, a duh apiangin online-a en theihin a awm dawn a ni.