VC-te'n an president hmingin Mizoram sorkar an khing leh

All Mizoram Village Council Association (AMVCA)-te'n VC term pawh tawi a nih avanga Mizoram sorkar an khinna Gauhati High Court (GHC), Aizawl Bench-in a hnâwl hnuah AMVCA chuan nimin khan an president K Lalngaizuala hmingin sorkar khinna High Court-ah an thehlut leh.

AMVCA hian VC term pawh tawi chungchanga Mizoram sorkarin notification November 20, 2024 a chhuah khinna December 6, 2024 khan GHC, Aizawl Bench-ah an thehlut a; VC term pawh tawina notification November 21, 2024-a chhuah a awm avangin hemi chungchang ngaihtuah ni December 13-ah an inhnûkdâwk leh nghal.

December 13, 2024 vek khan November 21, 2024 notification khinna AMVCA chuan an thehlut leh a, chumi chungchang chu January 13, 2025 Thawhṭanni khan High Court chuan a ngaihtuah. AMVCA chu Firms & Societies-a registration nei an nih loh avangin an khinna chu High Court chuan a hnawl a ni.

AMVCA chuan nimin khan an president K Lalngaizuala hmingin Mizoram sorkar khinna an thehlut leh nghal a; Gauhati High Court Aizawl Bench chuan naktuk hian a ngaihtuah hman beisei a ni.