Halpuah/halmawi khapna thlir let a ni; Hmasawnna tam tak hmuh tur a awm - HM

Krismas leh kum thar vuakvêta halpuah leh halmawi khap chungchang chu nimin khan Secretariat conference hall-ah thlir let a ni a; a kaihruaitu Home minister K Sapdanga chuan hmasawnna nasa tak hmuh tur a awm thu a sawi.

Home Minister chuan, Mizoram boruak vawn thianghlim zel tumna avanga Krismas leh kum thar vuakvêta halpuah/halmawi khapna kalpuinaa sorkar, kohhran leh tlawmngai pawl thawhhona leh hmalakna fakawm a tih thu a sawi a, "Hmasawnna nasa tak hmuh tur a awm kha a lawmawm. Thlir letna kaltlang hian hmalak chhunzawm dan tur ruahmanna ṭha tak duan chhuah ka beisei," a ti.

Thlir letnaa tarlan danin, Mizoram pumah halpuah leh halmawi kaihhnawih thupek bawhchhiat vanga thubuai ziah luh 55 zinga 48 chu Aizawl district-a mi a ni a; a bak chu Lungleiah pakhat, Champhaiah panga leh Serchhipah pakhat a ni. Thubuai kaihhnawiha thil man hlut zawng chu cheng nuai 24 chuang a tling.

Mizoram Pollution Control Board tarlan danin, boruak tehna Air Quality Index (AQI)-ah December 31, 2023 zana Aizawl boruak chu 597 a nih laiin, December 31, 2024 zanah chuan 115 a ni. District khawpui hrang hranga AQI Manual Station aṭanga a lan danin, district khawpui dang pawh AQI 50 hnuai lamah a awm deuh vek a ni.

Health & Family Welfare department tarlan danin, kum hlui thlah zan khan halpuah leh halmawi vanga inhliam leh harsatna tâwk Aizawl Civil Hospital-a inentir an awm lo.

Ṭhutkhawmah hian, district headquarters huam chhunga halpuah leh halmawi hâl ve miah lohna veng/khuate chu lawmpuina thuziak pek vek ni se, an ti a; halpuah leh halmawi khuahkhirhna kalpui zel dan tur ruahmanna siam turin Working Committee din an rel bawk.

Thlir letnaah hian chief secretary Khilli Ram Meena, Home secretary Vanlalmawia, DGP Anil Shukla, Aizawl DC Lalhriatapuia, Aizawl SP Rex Zarzoliana Vanchhawng, Aizawl City Local Council Association leh Central YMA aiawh leh official dangte an tel.