Social media-a thu dik lo thehdarh ṭhin hi kan beihho a ngai - IPR Minister

Information & Public Relations department-a thawkte leh Mizoram Journalists' Association-te chuan nimin khan IPR auditorium-ah kum thar 2025 puala inhlan tharna hun an hmang a, IPR minister Dr Vanlalthlana'n a hmanpui. Minister chuan, social media vela thu dik lo thehdarh ṭhin chu beih let ho a ngaih thu a sawi.

Inkhawm hi IPR director C Lalnunkima'n a kaihruai a; minster Dr Vanlalthlana chuan, kum tharah rilru thar nen hmasawn tum turin officer-te leh journalist-te a chah a, "Khawvel a danglam a, kan kum a lo danglam zel rual hian a ṭha lam zawngin danglam ve i tum ang u," a ti a; ram hmasawnna tur leh khawtlang hmasawnna tura sorkarin ruahmanna a siamte a puitlin theih nan ṭan lakpuiah IPR department-a thawkte leh MJA member-te a sáwm.

Dr Vanlalthlana chuan, technology a ṭhang chak a, social media-ah mi tu pawhin an duh dan leh ngaihdante an puang chhuak thei tawh tih a sawi a, "Ṭhenkhat phei chuan content an duh luatah thu dik a nih leh nih loh pawh thlu lovin, thlirtu/ngaithlatu neih tam duh avangin thil an ti a, mipui rilru an hruai kawi nasa ṭhin. Journalistic ethics ngaihtuah loin an duh duh an sawi mai ṭhin. Thu dik lo thehdarh ṭhin hi kan beihho a ngai a, information dik chauh thehdarh a nih theih nan ṭan kan lak tlan a ṭul," a ti.

Journalist-te chuan mipui hnenah thu dik leh rintlak, phuahchawp ni lo an thehdarh ṭhin tih sawiin Minister chuan, "Hemi kawngah hian nasa lehzuala kan ṭan a ngai a, IPR department nen ṭang kawpa theihtawp kan chhuah a ngai," a ti a; ruihhlo do kawngah theihtawpa ṭan lakpuiah journalist-te a sawm bawk.

IPR secretary Betsy Zothanpari Sailo pawhin thu sawiin, IPR department leh MJA member-te'n thawhhona ṭha tak an neih chu chhunzawm zel a pawimawh thu a sawi a; mahni ṭánghma ûm loa Mizoram tana ṭha tur ber ngaihtuah chung zela thawk turin kalkhawmte a sáwm.

Betsy Zothanpari chuan, sorkar hnathawk zingah hna thawk ṭha duh lote chu an hna aṭanga chawlhtir turin sorkarin thutlukna a siam tawh tih sawiin, "Review Committee pawh din a ni tawh a, inthlahdah leh thatchhiat vanga mahni hna thawk ṭha duh lote chu dim an ni dawn lo," a ti.

Thu sawitu dang MJA president C Lalrambuatsaiha chuan, Minister hoa IPR department leh MJA member-te'n inhlan tharna hun an hmangho chu lawmawm a tih thu a sawi a; Mizoram sorkarin journalist-te tan press tour a buatsaih ṭhin bakah, Mizoram Journalists Pension Scheme a taka hman a nih tak avanga an lawm thu a sawi bawk.

Inkhawmah hian IPR department-a thawkte leh MJA member-te bakah, journalist dang ṭhahnem tak an tel a ni.