Dinhmun harsate'n an chanvo ration card an chan theih nan hma kan la zel - FCSCA Minister

Food, Civil Supplies & Consumer Affairs (FCSA) minister B Lalchhanzova chuan, dinhmun harsate'n an chanvo dik tak ration card an chan ngei theihna turin hma an lak zel thu a sawi.

Meeting-a tarlan danin, tun dinhmunah Mizoramah ration card eng hmang mi 63,626, card pawl hmang mi 6,36,265, card sen hmang mi 11,570 leh card var hmang mi 4,60,109 an awm mek. Ration card vara buhfai khulte tan sorkarin kg khat zelah Rs 10 subsidy leh card sen hmang tan subsidy Rs 20 a pe a ni.

Supply Minister hian nimina a pisaa FCSCA department hmalaknate thlir letnaah thu sawiin, "Kan thupui turte chu, dinhmun harsate'n an chanvo dik tak chang rawh se tih leh, bûk dikin mipuite'n buhfai dawng ngei rawhse tih a ni. National Food Security Scheme hmalaknain mi 7,06,296 a tuam mek a, a phû ngei mi harsate lut ve lo an la awm nual tih hriat a ni," a ti.

Mi awmthei zawk zingah mi harsate chanvo chang an la awm nual tih hriat a nih thu sawiin B Lalchhanzova chuan, "Dinhmun harsate'n an chanvo ration card an chan ngei theih nan tha thlah loa hmalak zel tur a ni," a ti a; ration card dik nei tura an hmalaknate chu mipuite'n hrethiamin ṭawiawm zel se a duh thu a sawi.

FCSCA Minister chuan, card vara awm, dinhmun harsate tana Mizoram sorkarin buhfai kg. khat Rs 20-a an khul theihna tur Mizoram State Special Ration Package a duan chu inthlahrung loa dil turin mamawhtute a chah a, "Ration card sena ziak lut tawh mi 11,570 an awm mek a, veng tin leh khaw tina card sen mamawhte'n DCSO-ah dilna thehluh theih a ni," a ti.

India ram pumah January 2023 aṭangin buhfai man a to chho tih sawiin Minister chuan, "Sorkar hmasa khan card var hmangte buhfai khulna rate tihsan tumin thui tak hma a lo la tawh a, ZPM sorkar chuan sorkar hmasate hmachhawp bawhzuiin buhfai man hi a ennawn ta a ni," a ti a; chhungkaw tinte chu an sum lak luh miin lang chhuak ngam se a duh thu a sawi.

Ṭhutkhawma tarlan danin, FCSCA department chuan bûk dika mipuiin buhfai an khul theih nan theihtawp a chhuah zel a, kudam aṭanga buhfai bûk dik lo awm ṭhin chu ûm zui zel niin, retailer-te pawh bûk dika mipui hnena buhfai pe ngei turin hriattir nawn an ni.

Buhfai la turte'n kutzungpui nem (e-pos) an hman danah inbumna a awm zui loh nan thuchhuah siam reng a ni a, retailer aṭanga buhfai la turte'n an lak dawnah chauh kutzungpui nem tur niin, nem lâwk a ngai lo a, nem loh vangin ration quota a bo thei lo.