KHAWTHLIR

KṬP-in thisen pe

KṬP, Sihphir Vengthar Pastor Bial chuan nimin khan Synod Hospital tan thisen unit 24 an pe. Blood donation camp hi Sihphir Vengthar Golden Jubilee hall-ah neih a ni.

CM nen inkâwm

Chief minister Lalduhoma chuan nimin khan a pisaah Toyota Kirloskar Motors (TKM) country head Vikram Gulati, vice president Arun G Nair leh Mizoram dealer principal Zorammawia Tochhawng (Zote Toyota)-te a kâwm a, CSR hmanga Mizoram tana hmachhawp an siamte a sawipui. Toyota company hotute hian Mizoram tan India rama an CSR hmanga hma an lakna lian ber dawttu ni phak tur ruahmanna an duan mek thu Chief Minister an hrilh.

Tla hlum

B Lalrintluanga (37) s/o B Robuanga, Venghlui chu January 13, Thawhṭanni zan khan an garage (lirthei dahna) bul aṭangin a tla a, a hliam tuar loin a thi. Thu dawn danin, B Lalrintluanga hi zan dar 7:30 vela an garage bul step-a a ṭhu chu chesualin, ft. 17 vela sangah a tla a, damdawi-in panpui a nih hnuah a hliam tuar loin zan dar 8 velah a thi a ni.

Jail-a hmeichhe dinhmun zirho

Mizoram Law College leh National Commission for Women, New Delhi ṭang dun chuan nimin khan Aijal Club-ah 'Regional Law Review Consultation on Laws Relating Women in Prisons (North East Region)' an buatsaih a; Gauhati High Court judge Justice Marli Vankung leh National Commision for Women law officer Manmohan Verma ten an hmanpui. India ram hmun hrang hrang aṭangin palai 27 an tel a, jail-a hmeichhia tángte enkawl dan leh anmahni humhalhna dan pali zirho a ni.

RBD intuaitharna

Lunglei leh Lawngtlaiah nimin khan nau piang leh mitthi chhinchhiahtute intuai tharna, Annual Training of Registrar of Births & Deaths buatsaih a ni. Lungleiah chuan additional DC James Miahlung-in a hmanpui a, Lawngtlaiah chuan bawrhsap Cheemala Siva Gopal Reddy-a'n a hmanpui. RDB-te chu ram leilung fa ni lote hnena birth certificate pek a nih loh nan ṭan la tura fuih an ni.