ITI, Aizawlah Toyota programme hawng

Labour, Employment, Skill Development & Entrepreneurship (LESDE) minister Lalnghinglova Hmar chuan nimin khan Industrial Training Institute (ITI), Aizawlah Toyota Technical Education Programme (T-TEP) a hawng. Minister chuan, T-TEP kaltlangin ṭhalaite tan industry liana thawh theihna kawng a inhawn a beisei thu a sawi.

Lalnghinglova Hmar chuan, ṭhalaite tana thiamthil zir chhuahna bung thar a inhawng leh ta tih sawiin, "Mizoram sorkar chuan ṭhalaite'n chhawr tlak thiamna an neih theih nan kawng hrang hrangin hma a la a, a bik takin skill development and entrepreneurship atan theihtawp a chhuah. TKM nena thawhhona zarah hian ṭhalaite tan industry lian tak takahte thawh theihna kawng a inhawn theih ka beisei," a ti a; zirlaite chu tih tak takna nen theihtawp chhuaha zir turin a chah.

ITI chu kum 60 chhung ṭhalaite hnena eizawnna tlak thiamna chi hrang hrang petu a nih thu sawiin LESDE Minister chuan, "Sorkarin a ngai pawimawh a, building sak thar a nih dawn bakah, a bul hnaiah hmeichhe hostel sak tum a ni," a ti.

T-TEP hnuaiah hian Toyota Kirloskar Motor Private Limited (TKM) chuan ITI-a zirlaite tan general technician (mechanic) course zirtirna an kalpui dawn a; kum khat chhung zir niin, course zawh dawnah exam an paltlang chuan Toyota certificate pek an ni ang. Training hmasa berah mi 24 lak phawt a ni.

T-TEP hawnnaah hian ITI, Aizawl principal PC Lalhriatpuia, TKM executive vice chairman leh country head Vikram Gulati, general manager PA Balusubramanaim, Zote Toyota aiawh Zorammawia Tochhawng te pawhin thu an sawi a; vice president Arun G Nair chuan zirlai pahnih hnenah scholarship a hlan a ni.