Inhlan tharna leh infuih tharna hun hmang

Cooperation minister PC Vanlalruata hoin nimin khan Registrar of Cooperative Societies (RCS) office-ah Cooperation department thawktute'n kum 2025 atana inhlan tharna hun an hmang. Mizoram Public Service Commission (MPSC)-a thawkte pawhin Finance auditorium-ah kum thar atana infuih tharna hun an hmang bawk.

Cooperation Minister chuan, Cooperation department-a thawkte chu an hna kaihhnawih thil chi hrang hrangah ṭan la tur leh rinawm taka hna thawk turin a chah a, "Department lian ni lo mah ila, sorkar flagship programme-ah hmun pawimawh tak kan chang dawn. Cooperation department hnuaia enkawl mek society zawng zawngte tichak turin ṭan lak a ṭul," a ti.

MPSC-a thawkte puala kum thar puala infuih tharnaah MPSC chairman R Lalramnghaka chuan, MPSC hnuaia thawktute chu kum thar a nih anga ṭhahnemngaihna nen dik leh ṭha taka hna thawk turin a fuih. MPSC member PB Lianthangpuii leh K Lalhmingliana te pawhin thu an sawi a; MPSC-a thawkte'n kum thar thutiam an sawi rual a ni.

Chawhnu lamah MPSC-a section hrang hrang - Establishment, Accounts, Store & Vehicle, RTI & Record, Confidential, Direct Recruitment leh Promotion-te kaltlanga hna hrang hrang an thawh te, an hlawhtlinna leh hmasawn ngaihna laite an tarlan bakah, sawihona hun hman a ni.