IPR Minister leh officer-te inkâwm

Information & Public Relation (IPR) minister Dr Vanlalthlana chuan nimin khan IPR Director pisaah department officer-te a kâwm a; mipui hnena thu dik leh rintlak chauh hriattirtu ni tura ṭan la zel turin information officer-te a fuih.

Dr Vanlalthlana chuan, IPR officer-te chu an pawimawhzia hre reng tura chahin, "Mipui hnena thu dik leh rintlak chauh hriattirtu ni turin ṭan la zel u la, hemi tur hian mahni inchher hriam a, a tam thei ang ber training-ah tel tum zel ang che u. IPRO-te hi district hrang hrangah mipui laka sorkar hmel tilangtu in ni," a ti a, theihtawp chhuah tur leh nun vawng uluk turin a chah.

Inkawmhona hi IPR director C Lalnunkima'n a kaihruai a, tun hnaia Indian Institute of Mass Communication (IIMC), Delhi-a training-a kal IPR officer-te aiawhin team leader Malsawmsanga, deputy director-in report a pe. Department hmalakna leh hmachhawpte sawiho a ni bawk.

He hunah hian IPR secretary Betsy Zothanpari Sailo, district hrang hranga IPRO-te leh IPR Secretariat-a officer-te an tel a ni.