NLUP sem chhunzawm zel

Agriculture department chuan nimin khan Lawngtlai district-a NLUP hnuaia leilet (WRC-1) leh tlangram terrace hmang­a thlai chîn (WRC-2) thlangtu chhungkaw 833 hnenah ṭanpuina second phase third instalment an sem a; khaw hrang hrangah a rualin an sem. WRC-1 thlangtute hnenah Rs. 30,000 ṭheuh leh WRC-2 thlangtute hnenah Rs. 20,000 ṭheuh pek a ni.

Soil & Water Conservation department pawhin nimin khan Mamit district-a khaw ṭhenkhatah ṭhelrêt, coffee leh hmunphiah chìn thlangtute hnenah ṭanpuina sum an sem. Ṭhelrêt thlangtu Bungṭhuam, Luimawi, Kanhmun, Zawlnuam, Kawrthah, Sihthiang leh Thinghlun khuaa chhungkaw 67 hnenah Rs. 45,000 ṭheuh; coffee thlangtu Hriphaw khuaa chhungkaw 25 hnenah Rs. 64,400 ṭheuh; Sihthiang khuaa hmunphiah thlangtu chhungkaw pathum hnenah Rs. 26,600 ṭheuh pek a ni.