Indian Army-a Mizo officer thar lawmpui

National Defence Academy (NDA) paltlanga IMA pass chhuak, Indian Army-a commission officer thar, Lalremruata Ralte s/o Lalthanzuala, Mission Vengthlang chu nimin khan School Education department-in an directorate conference hall-ah an chawimawi a; parliamentary secretary (School Education) Joseph Lalhimpuia’n a hmanpui.

Joseph Lalhimpuia chuan, sipaia commissioned officer-a luh chu thil har a nih thu sawiin, "Mizo zingah NDA paltlanga IMA pass chhuak thar kan awm hi kan chhuang hle a, School Education department-in kan ngaihlu a, Mizo zirlai tan kan icon a ni," a ti a; Mizo zingah sipai lama thleng sang ber ni tura a beisei thu a sawi.

Chhingchhipa Sainik School sak mek chu kum 2017-ah class VI aṭangin ṭan a ni dawn tih sawiin, Lalhimpuia chuan, "Seat 66 a awm dawn a, entrance paltlanga luh a ngai dawn," a ti. Lalremruata Ralte chu Mizoram quota-a Sainik School, Manipur-a zir chhuak a ni tih sawiin, Imphal Sainik School-ah hian Mizoram School Education department-in seat 30 a neih thu te, RIMC-a seat 24 awmah Mizoramin seat pakhat a nei thu leh, Banasthali, Rajasthan-ah hmeichhe tan seat 15 a neih thu a sawi bawk.