UD&PA minister-in mirethei in sak a tlawh

UD&PA minister Zodintluanga chuan nimin zing khan Basic Service to Urban Poor (BSUP) hnuaia Durtlang chuan hnuai lama miretheite chenna tura in sak mek a enfiah. Minister chuan, in sak tawh ṭhenkhat chu leimin vangin luah ngam a ni dawn lo a, ṭhiah leh a nih tur thu a sawi.

Zodintluanga chuan, leimin leh tuihâwk vangin mirethei chenna tur in sak mek, zawh ṭêp tawhte zinga ṭhenkhat chu metre thum laia a tlakhniam thu a sawi a, "Luah ngam tur chi a nih loh avangin ṭhiah leh vek a ngai ang. A dangte erawh chu sak chhunzawm zel a ni ang a, sorkar kum tharah chuan luah theih tura peihfel beisei a ni," a ti.

UD&PA Minister sawi danin, tun hnaia ruahsur leh leiminin housing complex panna kawng a tichhia a, in ṭhenkhat pawh a tichhia a ni. A panna kawng chu tuihâwkin a hawrh nasa hle bawk.

Durtlanga BSUP Housing Complex sak mek hi National Project Construction Corporation Ltd. leh Royal Infra Construction Ltd. ten an sa a, kum 2009-ah sak ṭan a ni. In 20 leh community hall tur sak a ni a, in pakhatah chhungkaw eng emaw zat an cheng thei dawn a ni.

In pakhat sak nan cheng nuai 64 zel ruahman a ni a, a vaia sak nan cheng vbc. 26.23 ruahman a ni. Tun dinhmun­ah 75% sa zo tawha ngaih a ni.