Mamitah World Blood Donor Day hmang

Mamit District Hospital blood bank leh Association for Voluntary Blood Donation (AVBD) Mamit Branch-te huaihawtin nimin khan Mamita IPR Conference Hall-ah World Blood Donor Day hman a ni. Mamit DC Vanlalngaihsak­a khuallian niin, thisen pe ṭhate hnen­ah chawimawina a hlan.

Bawrhsap Vanlalngaihsaka chuan, thiamna sang zel mah se, thisen thlaktu tur siam chhuah a la nih loh thu sawiin, "Thi­sen pe ṭhintute avangin mi tam takin damna an chan phah a ni. Ṭhalaite zingah thisen pe thei tura invawng leh inuluk an tam tial tial hi a lawmawm hle a ni," a ti a, Mizo ṭhalaite chu thisen pe zel thei tura an nun vawng uluk turin a chah.

Mamit blood bank officer Dr Zothansangi'n report a pek danin, kum 2014-15 chhung khan Mamit District Hospital-ah thisen unit 389 pek a ni a, a petute mipa 310 leh hmeichhia 79 an ni. Thisen pek zawng zawng zinga unit 269 chu a thlawna pek a ni a, unit 129 chu thisen hman rulh lehna a ni. Blood donation camp vawi kua neih a ni.

Mamita World Blood Donor Day hmannaah hian kum 2014-15 chhunga thisen pe tam pawl leh mimal hnenah chawimawina hlan a ni. Pawl hminga pe tam ber chu Dapchhuah branch YMA an ni a, PYD (NEI) leh Mamit corps SAY-te'n an dawt. Mimala thisen pe tam CL Zarliana leh Nancy Laldinthari, Mamit ve vete hnenah chawimawina hlan a ni bawk.