July-a Assembly session neih turah Food Security Rules pharh dawn

Food Civil Supply & Consumers Affairs (FCS&CA) minister John Rotluangliana chuan, Assembly session neih leh hmasak berah Food Security Act (FSA) atana Rules duan chu pharh a nih dawn tih a sawi.

Nimina Congress Bhavan-a thu a sawina­ah John Rotluangliana chuan, Mizoram chu FSA-a lut lo thei lo dinhmunah a din tawh thu a sawi a, "FSA-in a huam loh tur hi mi 5,37,000 vel an awm a, hengte hian man tlawm zawka buhfai an lei theih dan tur kan ngaihtuah mek. FSA hman a nih chuan Mizoram sorkarin buhfai mana a sum sen ral a tlem zawk dawn a ni," a ti.

FCSCA Minister sawi danin, FSA-in a huam tur thlang turin district leh village level-ah committee din a ni dawn a; district level-ah chuan DC-in a kaihruai ang a, V/C level-ah chuan bial­tu DCSO chairman-na hnuaiah V/C member-te leh vantlanga mi challang pahnih member an ni ang.

John Rotluangliana chuan, sorkar laipui chu kalphung la nei loah puhin, "Sorkar laipuiin kalphung a la neih loh avangin a buaithlak hle. Hmasawnna hnathawhna atana first instalment kan dawn tawhte kha, Central-a sorkarna inthlak hnuah kan dawn chhunzawm lo a, hna thawh chhunzawm ngaihna a awm lo," a ti.