SBM-ah Lungleiah inthiarna 50 sa

Lunglei District Level Swachh Bharat Mission (Urban) Committee chu Thawhlehni tlai khan Lunglei Circuit House-ah an ṭhu a; YMA sub-hqrs. Lunglei nena thawkhoin mimal inthiarna, individual household latrine (IHHL) 50 sak a nih mek thu leh vantlang inthiarna 20 sa tura ruahman mek a nih thu an tarlang.

Meeting hi Committee chairman leh Lunglei DC Abhijit Vijay Chau-dhari-a'n a kaihruai a; Lungleia UDPA officer leh member-secretary Andrew Lalhruaia'n Swachh Bharat Mission (Urban) thil tumte leh Lunglei khawpui huam chhunga an hmalak tawhnate a sawifiah.

Lunglei khawpui Open Defecation Free (ODF)-a puang thei tura hmalak dan turte an sawiho a; IHL 100 dang sa leh turin state level-ah dilna thlen ni se, an ti. Vantlang inthiarna sak zawhte chu tlo taka enkawl a nih theih dan tur sawiho a ni a; sikula inzirtirna kalpui dan turte an sawiho bawk.

Lunglei district-ah hian census town pathum a awm a; khawpui (town) dang - Hnahthial leh Tlabungahah pawh Swachh Bharat Mission (Urban) hna kalpui ṭan thuai beisei a nih thu an sawi.