Siaha DC leh MJA-te an inkâwm

Siaha DC thar Har-leen Kaur chuan, nimin khan Siaha District MJA member-te a pisaa léng-ah sáwmin, thingpui a in-pui a; Siaha district hmasawnna tur leh ngaih pawimawh turte an sawiho.

Harleen Kaur chuan, Siaha district tan theitawp chhuaha hna thawh a tum tih sawiin, Siaha MJA-te chu amah ṭawiawm tur leh finchhuah ṭhin turin a ngen a; MJA member-te pawhin theitawp chhuaha ṭawiawm zel an tum thu an hrilh bakah, Siaha district-in harsatna a tawh hrang hrangte an hrilh nghal.

MJA-te chuan, Har-leen-i chu Siaha district mipuite'n a lakah beisei sang tak an neih thu hrilh-in, Siaha Bawrhsap a nih chhungin an district-a thingtlang khua a tam thei ang ber tlawh a, mipuite harsatna a hmunah zir chiang turin an ràwn a; dikna, rinawmna leh Siaha district hmangaihna nena a thawh chhung chuan MJA-in a hnung an dâwl zel tur thu an sawi bawk.