MCSA-in MCS officer beih pawi an ti

Mizoram Civil Service Association (MCSA) chuan thuchhuah siamin, kumina Remna Ni lawm chungchanga Lawngtlai DC pisaa MCS officer-te leh Central YLA-te thu a inhmu lo chu pawi an tih thu leh, CYLA lamin MCS officer pahnihte an bei zui chu pawi an tih thu an tarlang.

MCSA chuan, boruak a dâi zui mai tura an ngaih laia CYLA hruaitute'n mimal taka MCS officee pahnihte an bei zui leh Lawngtlai district aṭanga sawn chhuak tura hun tiam neia sorkar an nawr zui chu pawi an tih thu an sawi a; MCS officer pahnihte laka sorkar an nawrna chu bànsan turin CYLA an ngen.

Sorkar hnarthawkte leh NGO-te chu mipui tana thawkho tur an nih thu an sawi rualin, MCSA chuan, thil eng emawah ngaihdan leh duh dan inan loh cháng a awm thei tih an sawi a, "Tun hnu zela MCS officer-te'n neitu rilru pu chunga ṭhahnemngai taka Lawngtlai district mipui tana rilru na lo leh thlamuang taka hna an thawh zel theih nan kan ngenna hi min tihhlawhtlinsak turin kan beisei tlat a ni," an ti.