Chawngchhuma'n Court-ah MNF khin tum

MNF national executive member (NEM) leh Lunglei sub-hqrs-a adviser CS Chawngchhuma chuan, MNF-a Lawngtlai, Siaha leh Lunglei sub-hqrs. hruaitu chu term tâwp hmaa an duh duh an ruat vanga dan bawhchhiaah puhin, Court-ah khin a tum thu a sawi.

CS Chawngchhuma hian nimin khan Aizawl Press Club-ah thuthar thehdarhtute a kâwm a; MNF sorkar laiin chhim lam hmasawnna an ngaihtuah lo niin a sawi. Lunglei district-a MNF hruaitute term tawp hmaa an ruat thar chungchangah MNF president Zoramthanga, senior vice president Tawnluia leh vice president Dr R Lalthangliana te chu mawhphurtuah a puh a ni.

Lungleia Mizo Hnam Rûnah MNF gen.hqrs. hruaitute thil tih dan a sawisel avangin CS Chawngchhuma hi MNF chuan insawifiah turin a ti a; a chhanna an pawm loh avangin CS Chawngchhuma chu NEM a nihna an paihsak a ni. Chawngchhuma chuan, Laldenga MNF a nih reng tur thu leh Mizo Hnam Rûn MNF a nih tawh loh thu a sawi bawk.